mail: Bill Thayer English Italiano Help Up Εἴσοδος πρότερον· 1‑10.24 This webpage reproduces part of Siege Defense by Aeneas Tacticus (Loeb Classical Library edition, 1928) The text is in the public domain. This page has been carefully proofread and I believe it to be free of errors. If you find a mistake though, please let me know! ὕστερον· 15‑16.15 This site is not affiliated with the US Military Academy.

USMA Home

ΑΙΝΕΙΟΥ

ΠΕΡΙ ΤΟΥ
ΠΩΣ ΧΡΗ ΠΟΛΙΟΡΚΟΥΜΕΝΟΣ ΑΝΤΕΧΕΙΝ

(X . . .)

 p62  25 ἔστωσαν δὲ διειλημμένοι ὡς εἰς παρατήρησιν·​1 οὕτως γὰρ ἂν διακείμενοι ἥκιστα ἂν δύναιντο νεωτερίσαι.

Ἔτι τοίνυν μηδὲ εἰς τὰς κοίτας λαμπτῆρας φέρεσθαι μηδὲ ἄλλο νυκτερινὸν φέγγος· ἤδη γάρ τινες, ἐπεὶ πάντῃ​2 ἐξείργονται μηδὲν​3 νεωτερίσαι, θέλοντες, μηδὲ πρὸς τοὺς πολεμίους τι πρᾶξαι, τοιόνδε τεχνάζουσι. 26 σὺν γὰρ τοῖς καλάθοις​4 καὶ στρώμασιν φερόμενοι​5 εἰς τὰς φυλακὰς λύχνα οἱ δὲ δᾷδας οἱ δὲ λαμπτῆρας, ἵνα δὴ​6 πρός τι κοιτασθῶσιν, διὰ​7 τούτων τῶν φεγγέων​8 σύσσημον ἐποιήσαντο· διὸ δεῖ πάντα τὰ τοιαῦτα ὑποπτεύειν.

XI. [Ἐπιβουλαί]

1 Ἔτι δὲ καὶ τῶν πολιτῶν δεῖ τοῖς​9 ἀντιπροθυμουμένοις προσέχειν τὸν νοῦν καὶ μηδὲν εὐθέως​10 ἀποδέχεσθαι διὰ τάδε. 2 ῥηθήσονται δὲ ἑξῆς αἱ  p64 ἐπιβουλαὶ ἐκ τῆς βίβλου​11 παραδείγματος ἕνεκεν, ὅσαι κατὰ πόλιν ἐξ ἀρχόντων ἢ ἰδιωτῶν γεγόνασιν καὶ ὡς ἔνιαι αὐτῶν κωλυθεῖσαι διελύθησαν.

3 Χίου γὰρ μελλούσης προδίδοσθαι, τῶν ἀρχόντων τις, συμπροδιδοὺς καὶ ἀπατῶν τοὺς συνάρχοντας​12 ἔπεισε λέγων, ὡς, ἐπειδὴ εἰρήνη εἴη, τοῦ τε λιμένος τὸ κλεῖθρον εἰς γῆν ἀνασπάσαντας ξηρᾶναι δεῖ καὶ πισσαλοιφῆσαι καὶ τὰ παλαιὰ τῶν νεὼν ἄρμενα ἀποδόσθαι, τῶν τε νεωρίων ἐπεσκευάσθαι τὰ στάζοντα καὶ τὴν ἐχομένην αὐτῶν στοὰν καὶ τὸν πύργον, ἐν ᾧ διῃτῶντο οἱ ἄρχοντες, ἐχόμενον τῆς στοὰς, ἵνα ἐκ προφάσεως κλίμακες προπορισθῶσιν​13 τοῖς μέλλουσι καταλαμβάνειν τὰ νεώρια καὶ τὴν στοὰν καὶ τὸν πύργον. 4 ἔτι δὲ συνεβούλευε καὶ τὸ πλῆθος τῶν τὴν πόλιν φυλασσόντων ἀπόμισθον ποιῆσαι, ἵν’ ὡς ἐλάχιστον δῆθεν ἀνάλωμα τῇ πόλει ᾖ.​14 5 καὶ ἄλλα τούτοις ὁμότροπα λέγων ἔπεισε τοὺς συνάρχοντας ἅπερ ἔμελλεν​15 τοῖς προδιδοῦσι καὶ ἐπιτιθεμένοις​16 συνοίσειν πρὸς τὴν κατάληψιν· ὥστε ἀεὶ δεῖ προσέχειν τοῖς τὰ τοιαῦτα τελειοῦν​17 σπουδάζουσιν. 6 ἅμα δὲ τοῦ τείχους ἐκδήσας​18 κατεκρέμασε δίκτυα ἐλάφεια καὶ σύεια, ὡσεὶ ξηρᾶναι θέλων, καὶ ἄλλῃ ἱστία​19 ἔξω τοὺς καλοὺς ἔχοντα· καθ’ ἅπερ ἐν νυκτὶ ἀνέβησαν στρατιῶται.

 p66  7 Πρὸς δὲ ἀντιστασιώτας τοιόνδε ἐπράχθη ἐν Ἄργει. μελλόντων γὰρ τῶν πλουσίων τὴν δευτέραν ἐπίθεσιν ἐπιτίθεσθαι τῷ δήμῳ καὶ ξένους ἐπαγομένων, ὁ τοῦ δήμου προστάτης, προαισθόμενος τὸ μέλλον, τῶν ἐπιθησομένων τινὰς τῶν ὑπεναντίων ὄντων τῷ δήμῳ ἄνδρας δύο προσποιησάμενος φίλους εἶναι ἀπορρήτους, πολεμίους αὑτῷ​20 καθίστησιν αὐτοὺς καὶ ἐποίει κακῶς ἐν τῶν φανερῷ, σιγῇ δὲ τὰ​21 ἐκ τῶν ἐναντίων βουλεύματα ἤκουεν παρ’ αὐτῶν. 8 ἐπεὶ δ’ ἐν τῷ εἰσάγεσθαι τοὺς ξένους ἦσαν οἱ πλούσιοι, ἅμα δὲ καὶ τῶν ἐν τῇ πόλει τινὲς ἦσαν ἕτοιμοι, καὶ εἰς τὴν ἐπιοῦσαν νύκτα ἔμελλεν τὸ ἔργον ἔσεσθαι, ἔδοξε τῷ τοῦ δήμου προστάτῃ τὴν​22 ταχίστην ἐκκλησίαν συναγαγεῖν καὶ τὸ μέλλον μὴ προειπεῖν, ἵνα μὴ πᾶσα ἡ πόλις ταραχθῇ, εἰπόντα​23 δὲ ἄλλα τε καὶ ὅτι συμφέρον εἴη ἐν τῇ ἐπιούσῃ νυκτὶ σὺν τοῖς ὅπλοις πάντας Ἀργείους​24 παρεῖναι ἐν τῇ αὑτοῦ​25 φυλῇ ὄντας ἕκαστον.​26 9 ἐὰν δέ τις ἄλλως​27 ἐκθῆται τὰ ὅπλα ἢ ἄλλῃ ἐξενεγκάμενος φανῇ, ὡς προδότης καὶ ἐπιβουλεύων τῷ δήμῳ πασχέτω τι. 10 τοῦτο δὴ αὐτὸ ἵνα κατὰ τὰς φυλὰς ὄντες οἱ πλούσιοι μὴ δύνωνται εἰς ταὐτὸ ἀθροισθέντες μετὰ τῶν ξένων ἐπιθέσθαι, ἀλλ’ ἐν ταῖς φυλαῖς ὄντες διακεχωρισμένοι ὦσιν ἐν πολλοῖς ὀλίγοι φυλέταις. καλῶς δὲ δοκεῖ καὶ ἀγχινόως μετ’ ἀσφαλείας διαλῦσαι τὸ μέλλον.

 p68  10a Παραπλησίως δὲ ἐν Ἡρακλείᾳ τῇ ἐν τῷ Πόντῳ, οὔσης δημοκρατίας καὶ ἐπιβουλευόντων τῶν πλουσίων τῷ δήμῳ καὶ μελλόντων ἐπιτίθεσθαι, προγνόντες οἱ προστάται τοῦ δήμου τὸ μέλλον, οὐσῶν αὐτοῖς τριῶν φυλῶν καὶ τεσσάρων ἑκατοστύων, ἔπεισαν τὸ πλῆθος ἑξήκοντα εἶναι ἑκατοστύας, ἵνα ἐν ταύταις καὶ εἰς τὰς φυλακὰς καὶ εἰς τὰς ἄλλας λειτουργίας φοιτῶσιν οἱ πλούσιοι. 11 συνέβαινεν καὶ ἐνταῦθα διεσκεδασμένους εἶναι τοὺς πλουσίους καὶ ἐν ταῖς ἑκατοστύσιν ὀλίγους​28 ἑκάστοθι παραγίγνεσθαι ἐν πολλοῖς δημόταις· 12 ὁμότροπον δέ τι τούτῳ καὶ πάλαι​29 ἐν Λακεδαίμονι γενέσθαι.​30 μηνυθείσης γὰρ ἐπιβουλῆς τοῖς ἄρχουσιν ὅτι ὅταν ὁ πῖλος​31 ἀρθῇ ἐπιθήσονται, ἔπαυσαν τοὺς ἐγχειροῦντας ἐπιθέσθαι, κήρυγμα ἀναγγείλαντες τοὺς τὸν πῖλον​32 μέλλοντας ἆραι μὴ ἆραι.

13 Ἐν Κορκύρᾳ δὲ ἐπανάστασιν δέον γενέσθαι ἐκ τῶν πλουσίων καὶ ὀλιγαρχικῶν τῷ δήμῳ (ἐπεδήμει​33 δὲ καὶ Χάρης Ἀθηναῖος φρουρὰν ἔχων, ὅσπερ​34 συνήθελεν τῇ ἐπαναστάσει) ἐτεχνάσθη τοιόνδε. 14 τῶν τῆς φρουρᾶς τινες ἄρχοντες σικύας προσβαλόμενοι35  p70 καὶ τομὰς ἐν τῷ σώματι ποιησάμενοι καὶ αἱματωθέντες ἐξέδραμον εἰς τὴν ἀγορὰν ὡς πληγὰς ἔχοντες, ἅμα δ’ αὐτοῖς εὐθὺς προπαρεσκευασμένοι οἵ τε ἄλλοι στρατιῶται τὰ ὅπλα ἐξηνέγκαντο καὶ τῶν Κορκυραίων οἱ ἐπιβουλεύοντες. 15 τῶν δ’​36 ἄλλων ἀγνοούντων τὸ πρᾶγμα καὶ εἰς ἐκκλησίαν παρακληθέντων συνελαμβάνοντο οἱ προστάται τοῦ δήμου, ὡς ἐπαναστάσεως γενομένης​37 ἐξ αὐτῶν, καὶ τὰ ἄλλα μεθίστασαν πρὸς τὸ συμφέρον αὑτοῖς.38

XII. [Περὶ συμμάχων ἃ δεῖ προνοεῖν]

1 Χρὴ δὲ καὶ συμμάχων εἰς τὴν πόλιν . . .​39 μήποτε ἅμα διατελεῖν τοὺς συμμάχους, ἀλλὰ διεσκεδάσθαι ὁμοτρόπως τῶν αὐτῶν ἕνεκεν τοῖς προειρημένοις. 2 τὸ δὲ αὐτὸ καὶ μετὰ ξένων μισθοφόρων μέλλοντάς τι πράσσειν ἀεὶ χρὴ ὑπερέχειν πλήθει καὶ δυνάμει τοὺς ἐπαγομένους πολίτας τῶν ξένων· εἰ δὲ μή, ἐπ’ ἐκείνοις γίγνονται αὐτοί τε καὶ ἡ πόλις. 3 οἷον Χαλκηδονίοις πολιορκουμένοις παρόντες σύμμαχοι . . .​40 ἔπεμψαν φρουρὰν αὐτοῖς οἱ τῶν Χαλκηδονίων​41 σύμμαχοι. βουλευομένων τὰ αὑτοῖς​42 συμφέροντα οὐκ ἔφασαν​43 οἱ φρουροὶ ἐπιτρέψειν, ἐὰν μὴ καὶ Κυζικηνοῖς δοκῇ​44 εἶναι συμφέροντα, ὥστε τοῖς Χαλκηδονίοις​45 τὴν φρουρὰν ἔσω οὖσαν46  p72 πολὺ φοβερωτέραν εἶναι τῶν προκαθημένων πολεμίων. 4 δεῖ οὖν μήποτε εἰς πόλιν οἰκεῖαν μείζω δύναμιν ἐπακτὸν​47 δέχεσθαι τῆς ὑπαρχούσης τοῖς πολίταις, ξένοις τέ χρωμένην​48 ἀεὶ δεῖ τὴν πόλιν πολλῷ ὑπερέχειν τῆς τῶν ξένων δυνάμεως· οὐ γὰρ ἀσφαλὲς ξενοκρατεῖσθαι καὶ ἐπὶ​49 μισθοφόροις γίγνεσθαι. 5 οἷον καὶ Ἡρακλεώταις τοῖς ἐν τῷ Πόντῳ συνέβη. ἐπαγόμενοι γὰρ ξένους πλείονας τοῦ προσήκοντος, πρῶτον μὲν τοὺς ἀντιστασιώτας ἀνεῖλον, ἔπειτα αὑτοὺς​50 καὶ τὴν πόλιν ἀπώλεσαν, τυραννευθέντες ὑπὸ τοῦ εἰσάγοντος τοὺς ξένους.

XIII. [Ξενοτροφία]​51

1 Ἂν δὲ δέῃ ξενοτροφεῖν, ὧδε ἂν ἀσφαλέστατα​52 γίγνοιτο. χρὴ τοῖς ἐν τῇ πόλει εὐπορωτάτοις προστάξαι κατὰ δύναμιν ἑκάστῳ παρασχεῖν ξένους ἕκαστον, τοὺς μὲν τρεῖς, τοὺς δὲ δύο, τινὰς δὲ ἕνα· ἀθροισθέντων δὲ ὅσων ἂν δέοιο,​53 διελεῖν αὐτοὺς​54 εἰς λόχους, 2 καταστήσαντας ἐπ’ αὐτοὺς τῶν πολιτῶν τοὺς πιστοτάτους λοχαγούς. τὸν δὲ μισθὸν καὶ τὴν τροφὴν οἱ ξένοι παρὰ τῶν μισθωσαμένων λαμβανόντων, τὸ μέν τι παρ’ αὐτῶν, 3 τὸ δὲ καὶ τῆς πόλεως συμβαλλομένης. καὶ διαιτάσθωσαν ἕκαστοι ἐν ταῖς τῶν μισθωσαμένων οἰκίαις, οἱ δὲ τὰς λειτουργίας καὶ τὰς  p74 ἐκκοιτίας καὶ τὰ ἄλλα ἐπιτάγματα ἐκ τῶν ἀρχόντων ἀθροιζόμενοι ὑπὸ τῶν λοχαγῶν ὑπηρετούντων. 4 κομιδὴ δὲ τοῖς προαναλίσκουσιν εἰς τοὺς ξένους χρόνῳ τινὶ γενέσθω ὑπολογιζομένων​55 τῶν εἰς τὴν πόλιν εἰσφερομένων παρὰ ἑκάστου τελῶν· οὕτω γὰρ ἂν τάχιστά τε καὶ ἀσφαλέστατα καὶ εὐτελέστατα ξενοτροφηθείη.

XIV. [Ὑπόδειξις εἰς ὁμόνοιαν]​56

1 Τοῖς μὲν οὖν ἐν τῇ πόλει ὑπεναντία θέλουσιν τοῖς καθεστηκόσι προσφέρεσθαι ὡς προγέγραπται. τὸ δὲ πλῆθος τῶν πολιτῶν εἰς ὁμόνοιαν τέως μάλιστα χρὴ προάγειν, ἄλλοις τε ὑπαγόμενον αὐτοὺς καὶ τοὺς χρεωφειλέτας​57 κουφίζοντα τόκων βραχύτητι ἢ ὅλως ἀφαιροῦντα, ἐν δὲ τοῖς λίαν ἐπικινδύνοις καὶ τῶν ὀφειλημάτων τι μέρος, καὶ πάντα ὅταν δέῃ,​58 ὡς πολύ γε φοβερώτατοι ἔφεδροί εἰσιν οἱ τοιοίδε ἄνθρωποι, τούς τε ἐν ἀπορίᾳ ὄντας τῷ ἀναγκαίων εἰς εὐπορίαν καθιστάναι. 2 καὶ ὅπως ἴσως καὶ ἀλύπως τοῖς πλουσίοις ταῦτ’ ἂν​59 γιγνόμενα πράττοιτο καὶ ἐξ οἵων πόρων​60 πορίζοιτο, καὶ περὶ τούτων ἐν τῇ Ποριστικῇ βίβλῳ δηλωτικῶς γέγραπται.

Critical Notes:

1 Köchly and Rüstow: ὡσεὶ παρὰ τρισίν M.

2 Casaubon: ἐπὶ πάντη M.

3 Casaubon: μὴδὲº M.

4 Orelli: ἀκολούθοις M.

5 Haase: φερομένοις M.

6 Casaubon: δὲ M.

7 Added by Hercher.

8 Hercher (φέγγων: φεγγέων Behrendt): τοῦτον τὸν φεγγαῖον M.

9 R. Schöne: τοῖσ δει (with indication of wrong order) M.

10 εὐήθως (cf. XXVIII.7) Herm. Schöne.

11 ποριστικῆς βίβλου Hercher: πολιτικῆς Köchly and Rüstow: Casaubon thought of the ἀκούσματα: R. Schöne with great probability suggests an ἐπιβουλῶν βίβλος.

12 Casaubon: ἄρχοντας M.

13 R. Schöne: προσπορισθῶσιν M.

14 Casaubon: ἢ M.

15 Meineke: ἔμελλον M.

16 Köchly and Rüstow: ἐπιθεμένοις M.

17 B2C: λειοῦν M.

18 Haupt: ἐπιδήσας M.

19 Orelli: σύεια M.

20 Orelli: αὐτῶ M.

21 Casaubon: τὸ M.

22 Added by Schenkl.

23 εἰπεῖν Köchly and Rüstow: εἶπεν Herm. Schöne.

24 Schöne: M, now illegible, formerly reported to have μὲν οὓσ (?): ἄγει οὓς A: ἔχει οὓς B.

25 Köchly and Rüstow: ἀυτοῦ M.

26 Meier: ἑκατὸν M.

27 ἄλλοσε Reiske (ἄλλοσ’ R. Schöne).

28 Casaubon: ὀλίγοις M.

29 Köchly and Rüstow: παλαιὸν M.

30 C: γίνεσθαι M.

31 Casaubon: ὅτ’ ἂν ὁ πηλὸς M.

32 Casaubon: πηλὸν M.

33 Casaubon: ἐπιδημεῖ M.

34 Casaubon: ὥσπερ M.

35 Casaubon: προβαλλόμενοι M.

36 Added by Casaubon.

37 Meineke: γινομένης M.

38 Hercher: ἀυτοῖς M.

39 Casaubon indicated the lacuna: Reiske suggested ἐπηγμένων, which is followed in the translation.

40 Sauppe indicated the lacuna: R. Schöne suggests that an expression like κίνδυνον παρεσκεύασαν and some mention of the Cyzicenes have fallen out.

41 καλχιδονίων M.

42 Köchly and Rüstow: ἀυτοῖσ M.

43 Casaubon: ἔφησαν M.

44 Casaubon: δοκεῖ M.

45 καλχιδονίοισ M.

46 Casaubon: ἔσω ὁρᾶν M.

47 Casaubon: ἐπ’ ἀυτὸν M.

48 Köchly and Rüstow: χρώμενον M.

49 Casaubon: ἔτι M.

50 R. Schöne: ἀυτοὺς M.

51 In M this word follows the next sentence.

52 Hercher: ἀσφαλέστατοι M.

53 R. Schöne: ὅσων δέοιτο M.

54 C (?), Casaubon: ἑαυτοὺσ M.

55 Haase: ὑπολογιζομένοις ὑπὸ M.

56 In M these words follow the next sentence.

57 Casaubon: χρεοφειλέτας M.

58 Haase: ὅτ’ ἂν δὲ M.

59 Hertlein: ταῦτα M.

60 Casaubon: πόνων M.

◂ previous						next ▸
Images with borders lead to more information. The thicker the border, the more information. (Details here.)
ΑΝΩ:		Αἰνείας ὁ Τακτικός	Ἀρχαία Στρατιωτική Ἱστορία	Στρατιωτικὴ Ἱστορία	Εἴσοδος
			Κλασικά Κείμενα	ΛακουσΚούρτιος
A page or image on this site is in the public domain ONLY if its URL has a total of one *asterisk. If the URL has two **asterisks, the item is copyright someone else, and used by permission or fair use. If the URL has none the item is © Bill Thayer. See my copyright page for details and contact information.

Προσιτότητα