XXIII (LXXIV)

Sic non Aethiopum campos aestate pererrem

nec Scythico brumam sub Iove nudus agam,

 p202  sic non imbriferam noctem ducentibus Haedis

Ionio credam turgida vela mari,

5 sic non Tartareo Furiarum verbere pulsus

irati relegam carmina grammatici:

nulla meos traxit petulans audacia sensus,

liberior iusto nec mihi lingua fuit.

versiculos, fateor, non cauta voce notavi,

10 heu miser! ignorans, quam grave crimen erat.

Orpheos alii libros impune lacessunt

nec tua securum te, Maro, fama vehit;

ipse parents vatum, princeps Heliconis, Homerus

iudicis excepit tela severa notae.

15 sed non Vergilius, sed non accusat Homerus:

neuter enim quaestor, pauper uterque fuit.

en moveo plausus! en pallidus omnia laudo

et clarum repeto terque quaterque "sophos"!

ignoscat placidus tandem flatusque remittat

20 et tuto recitet quod libet ore: placet.