ad litteras mittendas Bill Thayer	English	Italiano	Adjutorium	Sursum	Ostium
antecedens: II: Pars VII Haec pagina telaris pars est Epitomae Historiae Romanae Flori ab E. S. Forster editi apud Loeb Classical Library, Londinio, MCMXXIX Hic textus in dominio publico est. Textum quam diligentissime perscrutavi et recensui — sed si quemlibet errorem invenies, mihi, obsecro, scribe. insequens: II: Pars IX

Lucius Annaeus Florus

Epitomae de Tito Livio
bellorvm omnivm
annorvm DCC libri II

Liber II (continuatio)

 p328  XXII. Bellvm Noricvm

(IIII, 12) 4 Noricis animos Alpes dabant, quasi in rupes et nives bellum posset ascendere; sed omnes illius cardinis populos, Breunos, Ucennos​1 atque Vindelicos, per privignum suum Claudium Drusum pacavit. 5 Quae fuerit Alpinarum gentium feritas, facile est vel per mulieres ostendere, quae deficientibus telis infantes suos adflictos humi​2 in ora militum adversa miserunt.

XXIII. Bellvm Illyricvm

6 Illyrii quoque sub Alpibus agunt imasque valles earum et quaedam quasi claustra custodiunt abruptis torrentibus inplicata. In hos expeditionem ipse sumpsit fierique pontes imperavit. 7 Hic et aquis et hoste turbantibus, cunctanti ad ascensum militi scutum de manu rapuit et viam primus ingressus est. Tum agmine secuto cum subrutus multitudine pons succidisset, saucius​3 manibus et cruribus,  p330 speciosior​4 sanguine et ipso periculo augustior​5 terga hostium percecidit.

XXIIII. Bellvm Pannonicvm

8 Pannonii duobus acribus fluviis, Dravo Savoque vallantur. Populati proximos intra ripas se recipiebant. In hos domandos Vinnium misit. Caesi sunt in utrisque fluminibus. 9 Arma victorum non ex more belli cremata, sed rupta​6 sunt et in profluentem​7 data, ut Caesari nomen eis qui resistebant sic nuntiaretur.

XXV. Bellvm Delmaticvm

10 Delmatae plerumque sub silvis agebant; unde in latrocinia promptissimi. 11 Hos iam pridem Marcius consul incensa urbe Delminio​8 quasi detruncaverat, postea Asinius Pollio gregibus, armis, agris multaverat — hic secundus orator — sed Augustus perdomandos Vibio mandat, 12 qui efferum genus fodere terras coegit aurumque venis repurgare; quod alioquin gens omnium stupidissima​9 eo studio, ea diligentia anquirit,​10 ut illud in usus suos eruere videantur.

 p332  XXVI. Bellvm Moesicvm11

13 Moesi​12 quam feri, quam truces fuerint, quam ipsorum etiam barbari barbarorum horribile dictu est. 14 Unus ducum ante aciem postulato silentio "qui vos estis?" inquit. Responsum invicem "Romani gentium domini." 15 Et ille "ita" inquit "fiet, si nos viceritis". Accepit omen Marcus​13 Crassus. Illi statim ante aciem inmolato equo concepere votum, ut caesorum extis​14 ducum et litarent et vescerentur. 16 Deos audisse crediderim: nec tubas sustinere potuerunt. Non minimum terroris incussit barbaris Cornidius​15 centurio satis barbarae, efficacis tamen apud tales homines stoliditatis, qui foculum gerens super cassidem, agitatum motu corporis, flammam velut ardenti capite funditabat.

XXVII. Bellvm Thracicvm

17 Thraces antea saepe, tum maxime Rhoemetalce​16 rege desciverant. Ille barbaros et signis militaribus et disciplina, armis etiam Romanis adsueverat; sed a Pisone perdomiti in ipsa captivitate rabiem ostendere. Quippe cum catenas morsibus temptarent, feritatem suam ipsi puniebant.

 p334  XXVIII. Bellvm Dacicvm

18 Daci montibus inhaerent. Inde Cotisonis​17 regis imperio, quotiens concretus gelu Danuvius iunxerat ripas, decurrere solebant et vicina populari. 19 Visum est Caesari Augusto gentem aditu difficillimam summovere. Misso igitur Lentulo ultra ulteriorem perpulit ripam; citra praesidia constituta. Sic tum Dacia non victa, sed summota atque dilata​18 est.

XXVIIII. Bellvm Sarmaticvm

20 Sarmatae patentibus​19 campis inequitant. Et hos per eundem Lentulum prohibere Danuvio satis fuit. Nihil praeter nives pruinasque et silvas habent. Tanta barbaria est, ut nec intellegant pacem.

XXX. Bellvm Germanicvm

21 Germaniam quoque utinam vincere tanti non putasset! Magis turpiter amissa est quam gloriose adquisita. 22 Sed quatenus sciebat patrem​20 suum C. Caesarem bis transvectum ponte Rhenum quaesisse bellum, in illius honorem concupierat facere provinciam; et factum erat, si barbari tam​21 vitia nostra quam imperia​22 ferre potuissent.

 p336  23 Missus in eam provinciam Drusus primos domuit Usipetes, inde Tencteros​23 percurrit et Catthos. Nam Marcomannorum spoliis et insignibus quendam editum tumulum in tropaei modum excoluit. 24 Inde validissimas nationes Cheruscos Suebosque et Sicambros pariter adgressus est, qui viginti centurionibus in crucem actis hoc velut sacramento sumpserant bellum, adeo certa​24 victoriae spe, ut praedam in anticessum pactione​25 diviserint.​26 Cherusci equos, 25 Suebi aurum et argentum, Sicambri captivos elegerant; sed omnia retrorsum. Victor namque Drusus equos, pecora, torques eorum ipsosque praedam divisit et vendidit; 26 et praeterea in tutelam provinciae praesidia atque custodias ubique disposuit per Mosam flumen, per Albin, per Visurgin. In Rheni quidem ripa quinquaginta amplius castella direxit. Bormam et Gesoriacum​27 pontibus iunxit classibusque firmavit. 27 Invisum atque inaccessum in id tempus Hercynium saltum patefecit. Ea denique in Germania pax erat, ut mutati homines, alia terra, caelum ipsum mitius molliusque solito videretur. 28 Denique non per adulationem, sed ex meritis, defuncto ibi fortissimo iuvene, ipse,​28 quod numquam alias, senatus cognomen ex provincia dedit.

 p338  29 Sed difficilius est provincias obtinere quam facere; viribus parantur, iure retinentur. 30 Igitur breve id gaudium. Quippe Germani victi magis quam domiti erant, moresque nostros magis quam arma sub imperatore Druso suspiciebant; 31 postquam ille defunctus est, Vari Quintilli libidinem ac superbiam haud secus quam saevitiam odisse coeperunt. Ausus ille agere conventum, et in Catthos​29 edixerat, quasi violentiam​30 barbarorum lictoris virgis et praeconis voce posset inhibere. 32 At illi, qui iam pridem robigine obsitos​31 enses inertesque maererent equos, ut primum togas et saeviora armis iura viderunt, duce Armenio​32 arma corripiunt; 33 cum interim tanta erat Varo pacis fiducia, ut ne prodita quidem​33 per Segestem​34 unum​35 principum coniuratione commoveretur. 34 Itaque inprovidum et nihil tale metuentem ex inproviso adorti, cum ille — o securitas — ad tribunal citaret, undique invadunt; castra rapiuntur, tres legiones opprimuntur. 35 Varus perditas res​36 eodem quo Cannensem diem Paulus et fato est et​37 animo secutus. 36 Nihil illa caede per paludes perque silvas cruentius, nihil insultatione barbarorum intolerabilius, praecipue tamen in causarum patronos.  p340 37 Aliis oculos, aliis manus amputabant, uni os obsutum, recisa prius lingua, quam in manu tenens barbarus "tandem" ait "vipera sibilare desisti." 38 Ipsius quoque consulis corpus, quod militum pietas humi abdiderat, effossum. Signa et aquilas duas adhuc barbari possident, tertiam signifer, prius quam in manus hostium veniret, evulsit mersamque intra baltei sui latebras gerens in cruenta palude sic latuit. Hac clade factum, ut imperium, quod in litore Oceani non steterat,​38 39 in ripa Rheni fluminis staret.

XXXI. Bellvm Gaetvlicvm

40 Haec ad septentrionem: sub meridiano tumultuatum magis quam bellatum est. Musulamos atque Gaetulos, accolas Syrtium, Cosso duce compescuit; unde illi Gaetulici nomen latius quam ipsa victoria. 41 Marmaridas atque Garamantas Quirinio​39 subigendos dedit. Potuit et ille redire Marmaricus, sed modestior in aestimanda victoria fuit.

XXXII. Bellvm Armenicvm

42 Ad orientem plus negotii cum Armeniis. Huc alterum ex Caesaribus, nepotibus suis, misit. Ambo  p342 fato breves, sed alter inglorius. Massiliae quippe morbo Lucius solvitur, in Syria Gaius ex volnere occubuit, cum Armeniam​40 ad Parthos se subtrahentem in ius​41 recepit. 43 Armenios victo rege Tigrane​42 in hoc unum servitutis genus Pompeius adsueverat, ut rectores a nobis acciperent. Intermissum ergo ius per hunc recuperatum non incruento, nec multo​43 tamen certamine. 44 Quippe Dones, quem rex Artageris​44 praefecerat, simulata proditione adortus virum intentum libello, quem ut thensaurorum rationes continentem ipse porrexerat, stricto repente ferro subiit. Et tunc quidem Caesar recreatus​45 est ex volnere in tempus, sed ***.​46 45 Ceterum barbarus undique infesto exercitu oppressus gladio et pyra, in quam se percussus​47 inmisit,​48 superstiti etiam nunc Caesari satisfecit.

---

Adnotationes Editoris:

1 Breunos, Ucennos Rossbachius: brennos, cennos B.

2 humi I, om. B.

3 saucius Aldus: sauciis BI.

4 speciosior: specior B: specisiore N.

5 augustior: auctior BI.

6 rupta Rossbachius: capta codd.

7 profluentem: profluente B: profluentes NL.

8 Delminio: deiminio B.

9 stupidissima Graevius: cupidissima codd.

10 anquirit Vinetus: adquirit codd.

11 Moesicum: Mysicum B.

12 Moesi N2I: mysi BN.

13 Marcus Monach.: marcius BN: martius L.

14 extis: exitus B.

15 Cornidius: chornidius B: Comidius Mommsenus.

16 Rhoemetalce: rhemetalce B.

17 Cotisonis: gotisoni B.

18 dilata: deleta B: dilatata L.

19 patentibus: iacentibus B.

20 patrem: patroni B.

21 barbari tam: barbaricam B.

22 quam imperia om. B.

23 Tencteros: cenceros B.

24 certa: certae B.

25 in anticessum pactione: ante pactionem B: inanticessum L.

26 diviserint: diviserunt B: dividerent L.

27 Gesoriacum: caesoria cum B: gesogiam cum N: genoso niam cum L.

28 ipse Perizonius: ipsi codd.

29 in Catthos (vel Chaucos) edixerat Rossbachius: incauto sedixerat B: incastos sedi rexerat N: incastris se direxerat L: incautius edixerat Halmius.

30 violentiam: vinolentia B.

31 obsitos Rehd.: oblitos BN.

32 Armenio NL: ar meno B.

33 prodita quidem Iahnius: perdita quidem aut prodita B.

34 Segestem L: segentem B.

35 unum: unius B.

36 perditas res N: perdi castra B.

37 Paulus et fato est et NL: diem potuisse fassus est ex B.

38 non steterat Baehrensius: constiterat codd.

39 Quirinio: quirjnio N om. B: curinio L Voss. Monac. Palat.

40 Armeniam: armenia B.

41 in ius Iahnius: ipsos B.

42 victo rege Tigrane: victor gentis Tigranen B.

43 multo: ulto B: multa L.

44 Artageris G. Vossius: artaxer ser par this B: artaxatis N: artasatis L.

45 recreatus — profundo (60,6) scripsit B1.

46 lacunam indicavit Iahnius.

47 percussus: percussu* B1.

48 inmisit: summisit B1: immisit L.

Images with borders lead to more information. The thicker the border, the more information. (Details here.)
ALTIVS:	Epitoma Flori	Textus Aevi Classici	LacusCurtius	Ostium
A page or image on this site is in the public domain only if its URL has a total of one *asterisk. If the URL has two **asterisks, the item is copyright someone else, and used by permission or fair use. If the URL has none the item is © Bill Thayer. See my copyright page for details and contact information.